അക്കൗണ്ട് ഹോൾഡറുടെ അനുവാദമില്ലാതെ പ്രധാനമന്ത്രി സുരക്ഷ ഭീമാ യോജന ഇൻഷുറൻസ് പ്രീമിയം ഈടാക്കി, എസ്ബിഐ നഷ്ടപരിഹാരം നൽകണം

കൊച്ചി : പ്രതിവർഷം 12 രൂപ വീതം 5 വർഷം കസ്റ്റമറുടെ സമ്മതമില്ലാതെ അക്കൗണ്ടിൽ നിന്നും പ്രധാനമന്ത്രി സുരക്ഷ ഭീമാ യോജന ഇൻഷുറൻസ് പോളിസി ഇനത്തിൽ തുക വകമാറ്റുകയും അത് തിരിച്ചു നൽകുന്നതിൽ കാല വിളംബം വരുത്തുകയും ചെയ്ത ബാങ്ക് 5000 രൂപ നഷ്ടപരിഹാരം നൽകണമെന്ന് എറണാകുളം ജില്ല ഉപഭോക്തൃതർക്ക പരിഹാര കോടതി. എറണാകുളം തൃപ്പൂണിത്തുറ സ്വദേശി കെ. വിശ്വനാഥൻ സ്റ്റേറ്റ് ബാങ്ക് ഓഫ് ഇന്ത്യ തൃപ്പൂണിത്തുറ ബ്രാഞ്ചിനെതിരെ സമർപ്പിച്ച പരാതിയിലാണ് കമ്മീഷന്റെ ഉത്തരവ്.

പരാതിക്കാരന്റെ രേഖാമൂലമുള്ള അനുവാദമില്ലാതെ സേവിങ്സ് ബാങ്ക് അക്കൗണ്ടിൽ നിന്നും 12 രൂപ 2015 മുതൽ പ്രതിവർഷം പ്രധാനമന്ത്രി സുരക്ഷ ഭീമാ യോജന എന്ന പദ്ധതിയിലേക്ക് ബാങ്ക് വക മാറ്റി. വിവരാവകാശ നിയമപ്രകാരം സമർപ്പിച്ച അപേക്ഷയിലാണ് നിയമവിരുദ്ധമായ ഈ നടപടിയെക്കുറിച്ച് പരാതിക്കാരൻ അറിഞ്ഞത്. അനുമതി ഇല്ലാതെയുള്ള പ്രീമിയം ഈടാക്കൽ നിർത്തിവയ്ക്കാൻ 2020ൽ പരാതിക്കാരൻ ആവശ്യപ്പെട്ടുവെങ്കിലും ബാങ്ക് അതിനു തയ്യാറായില്ല. 2021 വരെ അത് തുടർന്നു. ഉന്നത അധികാരികൾക്ക് പരാതി കൊടുത്തതിനെ തുടർന്നാണ് 2021 ൽ ആ പണം തിരിച്ച് നൽകിയത്. പരാതി ലഭിച്ചപ്പോൾ തുക മാറ്റുന്നത് നിർത്തിവെക്കുകയും തിരിച്ച് അക്കൗണ്ടിലേക്ക് നിക്ഷേപിക്കുകയും ചെയ്തുഎന്നാണ് ബാങ്കിൻ്റെ നിലപാട്. ബാങ്കിൻ്റെ നടപടിമൂലം മാനസിക ക്ലേശവും ധനനഷ്ടവും ഉണ്ടായെന്നും നഷ്ടപരിഹാരം നൽകണമെന്നും ആവശ്യപ്പെട്ടാണ് പരാതിക്കാരൻ കോടതിയെ സമീപിച്ചത്.

പരാതിക്കാരന്റെ അപേക്ഷയെത്തുടർന്ന് നിയമവിരുദ്ധമായ നടപടി ബാങ്ക് അവസാനിപ്പിച്ചുവെങ്കിലും പണം തിരിച്ചു നൽകാൻ ഒരു മാസത്തെ കാലതാമസവും ഉണ്ടായി എന്നത് സേവനത്തിലെ ന്യൂനതയും അധാർമികമായ വ്യാപാര രീതിയുമാണെന്ന് ഡി.ബി .ബിനു അധ്യക്ഷനും, വി .രാമചന്ദ്രൻ , ടി.എൻ.ശ്രീവിദ്യ എന്നിവർ അംഗങ്ങളുമായ ബെഞ്ച് നിരീക്ഷിച്ചു.

2000 രൂപ നഷ്ടപരിഹാരവും 3000 രൂപ കോടതി ചെലവും 45 ദിവസത്തിനകം പരാതിക്കാരന് നൽകാൻ എതിർകക്ഷികൾക്ക് കോടതി നിർദേശ നൽകി.