സിനിമയില്‍ മാത്രമല്ല, സംഘടിത തൊഴില്‍ മേഖലകളിലെല്ലാം ‘പവര്‍ ഗ്രൂപ്പു’കളുണ്ട്

തൽക്കാലം അത് അവിടെ നിൽക്കട്ടെ. ആദ്യം ഹേമ കമ്മിറ്റി റിപ്പോർട്ടിൽ പറയുന്ന കാര്യങ്ങളിൽ ഒരു തീരുമാനം വരട്ടെ.  മാതൃകാപരമായ നടപടി ഈ വിഷയത്തിൽ ഉണ്ടായാൽ മറ്റു രംഗങ്ങളിൽ ഉള്ളവരും സ്വമേധയാ അവരവരുടെ പ്രശ്നങ്ങൾ തുറന്നു പറയാൻ തയ്യാറായി മുന്നോട്ട് വരും.  കൂടെയുണ്ട് സർക്കാർ എന്ന പരസ്യവാചകം സത്യമെന്ന് ആദ്യം ഈ നാട്ടിലെ സ്ത്രീകൾക്ക്, പെൺകുട്ടികൾക്ക് ബോധ്യം വരട്ടെ. ബാക്കിയെല്ലാം താനേ ശരിയാവും.

സിനിമ മേഖലയിൽ പ്രവർത്തിക്കുന്നവരിൽ നിന്ന് ദുരനുഭവങ്ങൾ ഉണ്ടായിട്ടുണ്ട് എന്ന് പറയുന്നവർ അതേ മേഖലയിൽ ജോലി ചെയ്യുന്നവരാണ്. എന്നിട്ടും സംഘടനയിൽ അംഗമല്ലാത്തവരുടെ പ്രശ്നങ്ങൾ ചർച്ച ചെയ്യേണ്ടതില്ല എന്നുള്ള ഒരു നിലപാടിലേക്ക് ആ സംഘടന എത്തിയിട്ടുണ്ടെങ്കിൽ അതിലെ അപകടം കൂടി നമ്മൾ കാണേണ്ടതുണ്ട്. സംഘടിത ശക്തിയുടെ ഭാഗമല്ലാത്ത ആരെയും എന്തും ചെയ്യാം. ആരും ചോദിക്കാൻ ഇല്ല എന്നുള്ള ഒരു ധാർഷ്ട്യം കൂടി ഇവിടെയുണ്ട്.

സിനിമയ്ക്കകത്ത് മാത്രമല്ല സംഘടിത തൊഴിൽ മേഖലകളിൽ എല്ലാം പവർ ഗ്രൂപ്പുകൾ ഉണ്ട്. അധികാരം കയ്യാളുന്നവരോട് ചേർന്നുനിന്ന് സ്വാർത്ഥ താല്പര്യങ്ങൾ നേടിയെടുക്കുന്ന ഒരു വലിയ വിഭാഗമുണ്ട്. കടന്നുപോയ വർഷം സിനിമ വ്യവസായത്തിന് കോടികൾ നേട്ടമുണ്ടാക്കി കൊടുത്ത സിനിമകളിൽ എത്ര എണ്ണത്തിൽ സ്റ്റാർഡം നമുക്ക് കാണാൻ കഴിയും. പരമ്പരാഗത സങ്കല്പത്തിൽ നിന്ന് സിനിമ മാറി. അത് അംഗീകരിച്ചേ മതിയാകൂ. ഒരു വ്യവസായത്തിന് ലാഭമുണ്ടാക്കി കൊടുക്കുന്ന ഗ്രൂപ്പ് ഏതാണോ അതായിരിക്കണം പവർ ഗ്രൂപ്പ്. അല്ലാതെ പണ്ട് ആനപ്പുറത്തിരുന്ന തഴമ്പ് നോക്കി ആവരുത് അത്.

തിരിച്ചറിവുകളുടെ തിരുത്തലുകളുടെ തുറന്നുപറച്ചിലുകളുടെ നാളെകളാണ് മുന്നിലുള്ളത്. അതിന് ഹേമ കമ്മിറ്റി റിപ്പോർട്ട് നിമിത്തമാകും എന്നതിന് സംശയം വേണ്ട. അഥവാ അങ്ങനെ പ്രതീക്ഷിക്കുക എങ്കിലും ആവാം.