ജമ്മു കശ്മീരിനെ കൊള്ളയടിച്ചത് മൂന്ന് കുടുംബങ്ങൾ, അവരുടെ ആവശ്യം ഭീകരവാദം വളര്‍ത്തൽ: അമിത് ഷാ

‘നാഷണൽ കോൺഫറൻസിനും കോൺ​ഗ്രസിനും കല്ലെറിയുന്നവരെ തുറന്നുവിടണം. രജൗരിയിലും പൂഞ്ചിലും ഭീകരവാദം വളരണമെന്നാണ് അവരുടെ ആവശ്യം. നിയന്ത്രണരേഖ കടന്നുള്ള വ്യാപാരം പുനരാരംഭിക്കണമെന്നും അവര്‍ ആഗ്രഹിക്കുന്നു. ഇതുകൊണ്ട് ആർക്കാണ് നേട്ടം?’; അമിത് ഷാ ചോദിച്ചു.

മെഹ്ബൂബ മുഫ്തിയുടെ പിഡിപി(പീപ്പിൾസ് ഡെമോക്രാറ്റിക് പാർട്ടി)യുമായി ചേർന്ന് എൻസി-കോൺ​ഗ്രസ് സഖ്യം ഈ പ്രദേശത്തെ ഭീകരവാദത്തിന്റെ തീയിലേക്ക് തള്ളിവിടാനാണ് ശ്രമിക്കുന്നത്.

‘മൂന്ന് കുടുംബങ്ങൾ ചേർന്ന് ജമ്മു കശ്മീരിനെ കൊള്ളയടിച്ചു. കോൺ​ഗ്രസും നാഷണൽ കോൺഫറൻസും ഭരണത്തിലേക്ക് തിരിച്ചുവന്നാൽ ഭീകരാവദം തിരിച്ചുവരും. ജമ്മുവിന് സ്വന്തം വിധി തീരുമാനിക്കേണ്ടിയിരിക്കുന്നു. ബിജെപി അധികാരത്തിലേക്കെത്തിയാൽ ഭീകരവാദത്തെ തലപൊക്കാൻ അനുവദിക്കില്ല.’; അമിത് ഷാ പറഞ്ഞു. സമാധാനം പുനഃസ്ഥാപിക്കുന്നതുവരെ പാകിസ്താനുമായുള്ള ചർച്ചയുണ്ടാകില്ലെന്നും അമിത് ഷാ കൂട്ടിച്ചേർത്തു.